Contra

oh Hedy tiiat kos ma armuleegin pala
ja vintskle niiku kuiva maa pääl kala
kui tõispuul ilmämerd ma näe su armsat kujju
ja huugu võta et su manu ujju

kuus kõrda nädalin ma ratta sällän sõku
ja kipelt väntä  sukugi ei tuku
iks süamelüük jõud rattajoosust ette
ma postiringi lõpuss saa ta kätte
süä joba minnu uut tan mõtsatukan
Tagamõtsa tagumisen nukan
ei inämb ütte ihu ega hengehätä
ku sinnu Hedy saa ma kasvai nätä

su peräst istü Tagamõtsa söögilavvan
ja pallu süü et istü saasi kavva
et rahvas ummi tüüde manu läässi
me sukka Hedy katekesti jäässi

oh Hedi ku ma päsessi su tarre
heng helisama löösi kui kitarre
kõik ilmä varanduse võisi tuu iist massa
kui tules Hedy suud mul annass tassa
tuud hetke nõnna ullimuudu ooda
et vaihõpääl pääst ole peris sooda
ei ütski süük ei suta minnu toita
nii nigu mõte, et ma võisi Hedyt hoita
