KUIS MA AUTU KÕRDA TEI

Contra

löüdse issi üles autust
ärr tä minna tahtse kotust
et saeveskin palke kuuri
issi paistu väega kuri

„Kiä kül tennü parsa säändse!“
issi süütevõtit käändse
mootor inne üte kõrra
nigu tennü põrra-põrra

a sis jäigi peris vakka
ütskõik pallu issi takka
kruvikäändjä pihun jannas
ess saa auto täl sõbrannas

pikalt issi kotun püsse
ess lää tüüle saagma prusse
pallu asju kuun mi teimi
perega kuun lavvan seimi

a ku müüdä sai üts nätäl
sünnipäiv tull Põlva-tätäl
ma ess taha minnä jala
hiilse tassa autu ala

võtse säält kats juhtmejuppi
tsusassi na kokku tsupsti
hõiksi issit: „Tahass nätä
kas iks autul om suurt hätä!“
