Igor Ikonnikov sündü 1988. aastagal Tšernigovi oblastin, Ukrainan.
Ukraina jagonõs Hummogu- ja Õdagu-Ukrainas, õdagu puul kõnõldas inämb ukraina kiilt ja peetäs inämb avvu sisen ukrainlasõs olõmist.
Midä inämb hummogu poolõ minnä, tuud inämb tulõ ukraina keelele sisse vinne kiilt.
Igori kodokotus jäi hummogu ni õdagu piiri vaihõlõ.
Esä oll täl vinläne ja imä ukrainlanõ.
Eleti imä vanõmbidõ man.
Igori esä oll ehitäjä ni tä kuuld üte tutva käest, et Eestin või tüüd saia.
Nii sõs tull Igor 1990. aastagal üten vanõmbidõga Eestihte, Paidõhe.
Esä nakas tüüle ja imä jäi edimält väikse latsõga kodo.
Igor panti latsiaida, kon oll nii eesti ku vinne suust latsi.
Tuudaigo elli Paidõn kümne tuhandõ inemise ümbre ja tuhat näist kõnõli vinne kiilt.
Koton kõnõl Igor ummi vanõmbidõga vinne ja ukraina kiilt segilde.
Koolin tä käve vinne gümnaasiumin ja läbi käve inämbält jaolt vinne kiilt kõnõlõja kogokunnaga, pallo timä sõpro olli vinläse.
Üteliisi oll täl hulga tutvit ka eestläisi siän.
Päält kooli lõpõtamisõ läts tä opma Talna Tehniga Korgõhekuuli, kon  kõiki loengit peeti eesti keelen.
Edeotsa oll kõik rassõ ni harinõmalda, a kavvõmbahe tulõvikku kaiõn tull tuu tälle kasus, selle et tä sai eesti keele parõmbahe selges.
Tä käü seeniaoni läbi nii vinläisi ku eestläisiga ja timä tõõnõpuul Kirke om eestläne.
Kirke Igoriga saava kõikaig tõõnõtõõsõ käest kiilt mano oppi ja näide jutt käügi mõlõmban keelen.
Igor esi tund kül hinnäst kimmämbähe vinne kiilt kõnõldõn, selle et tä oppõ jo vinne gümnaasiumin, a tõõsõ kotusõ pääl om täl eesti kiil.
Ukraina grammatigat ei olõ tä elon opnu ja tuu kiil nakkas täl kahos unõhtuma, selle et tä tuud väega ei tarvida.
Igor olõ-i ilman tundnu, et timmä olõsi alambas peet tuuperäst, et tä om peri jaoldõ vinne kiilt kõnõlõjast perrest.
Tä usus, et egä inemine om uma õnnõ sepp ja arvas, et inemiisi tulõ hinnada näide tegemiisi ja väütämise perrä.
Säälsaman tä tunnistas, et vinne ja eesti kogokundõ vaihõl olõ-i suurõmbat läbikäümist ja om tunda, et hoiõtas ütsütest kavvõmbahe.
