Haanimaa kuts seo nätäl rahvast suidsusanna
 
6. - 9. põimukuu päivil om Haanjamaal viies kõrd suidsusaunnanätäl.
Sannasõbra saava esi sanna küttä, olla osalidse sanna tüütarõdõn, kullõlda sannalugusid ja elävät muusigat.
 
Osa võtma oodõtas sanna- ja kohaligu kultuuriperimüse huviliidsi, kiä tahtva teedä saija suidsusannakombist, tarkuisist ni tervüse praavitamisest sannan.
 
„Haanimaa suidsusannaperre omma uhkõ uma sannu üle, jagasõ huviliidsile hää meelega uma tiidmisi sannast, kombit ja uskmiisi, oppase talituisi ja tüüsid“ ütel sannanädäli üts iistvõtja Veeroja Eda.
„Ja vana kombõ perrä tohe-ei vett, tuld ni sannalõunu kinkalõgi kiildä!“
Hää sannankäük nakkas pääle lahkest meelest ja hengerahust. Sannaperedega ütenkuun toimendadas sannaga, tetäs süvvä ja süvväs, opitas mõnt tüüd vai tarkust.
Eräle omma oppusõ-kotusõ ja pidopaiga.
Nätäl nakkas neläpääväl, 6. põimukuu pääväl kell 12 Mooska talon, kon om sanna-perimüsmeditsiini opitarõ üten sannankäümisega. Tiidmisi jaga Kaasiku Ahto.
Riidi saa Ööbiksaare talon oppi sannapalkõ tapitamist ja varamist sannameistre Jallai Aivari käe all.
Alostusõs opitas palke kuurdmist liimeistrega.
Ööbiksaare palkmaja ehitaja omma päält paarikümne aasta palgest majju ehitänü ja koranu tarkuisi – om, midä tüütarõn tahtjaile näüdätä ja kõnõlda.
Päiv lõpõs Plaksi külän Tuulepesa talon, kon kell 19 nakkas pääle iloõdak laulu ja pillimänguga.
Suur sannapäiv om puulpäiv, ku kohaligu perre tegevä sannu ussõ valla.
„Seo päiv saava külälidse tetä kõkke tuud, midä tulõ ütel sannapääväl tetä: puie ja vee kandmine, sanna kütmine, söögitegemine, sannankäük.
Nii oldas üts tävveline päiv Haanimaa sanna man,“ selet Veeroja Eda.
Päiv nakkas kell 10 Haani rahvamajan, kon sannaperre ja külälidse umavaihel tutvas saava.
 
Sannanädäli lõpun pühäpäävä saa Haanimaa savvusannuga tutvas tsõõrsõidu pääl, miä alostas kell 11 Plaani keriku iist ja võtt aigu 2-3 tunni. Kell 13 alostas Suurõ Munamäe pääl suvõtarõ, kon om tegemist nii suurile ku latsilõ: Haanjamaa naisi iistvõtmisel saa käsitüüd tetä, miilt hoit rõõmsa rahvapillimuusika ja tulõ pääl havvus pudropada.
 
Suidsusannanädalit kõrraldas üten sannaperridega MTÜ Haanja Kultuurikoda.
Toes omma Vana Võromaa kultuuriprogramm ja Eesti Kultuurkapital.
 
Oppuisilõ, sannuhe ja tsõõrisõidule tahtja andku hindäst ette teedä:



Eda Veeroja
50 32 341
#eda.veeroja@gmail.com
