Iisraelin piävä kõik mehe, kel tervüs vähägi kand, tiinmä sõan tagonaväen.
Elon näütäs tuu vällä nii, et kõrd aastagan kutsutas mehe kolmõs nädälis sõariisto ala.
Väeliigi ja uma sõaväelidse eräala perrä tulõ tetä soldani tüüd, tulõ saista vahiposti pääl ja aigaolt kedägi vai midägi vahti.
Kõrd saadõti mi väejago vahti pidämä palõstiina vangõ laagrihe.
Tuun laagrin elli nn. administratiivsõ vangi, s.t. nuu, kedä säädüs lubasi ilma kohtulda määnegi aig vangin pitä.
Tõõnõkõrd olli nuu müüdäpäsemäldä vangivõtmisõ, tõõnõkõrd otsiti näide vangivõtmiisi jaos lisakinnütüisi.
Niimuudu võidi kinni panda kooni katõs aastagas (ku ma no õigõhe mälehtä) ja sääntse vangivõtmisõ õigõt põhjust tiidse õnnõ vastaluurõ.
Laagri oll periselt üts küländ lajalinõ plats, kon saisi suurõ sõaväe löövi üten kravatidõ ja kõgõ muuga, midä elos vaia.
Süvvä anti näile häste, sai jalota uma laagri maa pääl, a ümbretsõõri olli vahi ja korgõ aid.
Mii istõ ülevän ummi vahipostõ pääl ja kai päält, kuis laagri eläs.
Hammõ all oll meil transistor vastavõtja ja paslagu ala olli käkidü kõrvaklapi.
Aigo uma sektori elonikkõ kaia oll meil küländ.
Ma opsõ vaiht tegemä esi vurhvi inemiisil, mõtli näide kotsilõ vällä näide luu ja kai, et ma uma posti pääl magama ei jääsi.
Ao joosul nakas mullõ silmä üts poiss.
Välästpuult paistu tä mukka umbõs üteiäline.
Meil mõlõmbil olli pikä hiusõ ja habõna.
Kavvõst kaia võisõ üldä, et meil om midägi ütist.
Timä kai minno kah ja ma pandsõ tähele, mi perüs tihtsähe silmässi tõõnõtõist.
Käega tälle lehvütämä ma peris es nakka, a mii uudishimo tõõnõtõõsõ vasta oll küländ selge.
Ma kõnõli tuud ütele sääl tüütäjäle, kiä kõkkõ kõigist sääl tiidse ja tä selet, et tuu poiss ollõv tohtri, arvada Ramallist, ja ei ollõv peris arvo saia, mink iist tedä kinni panti.
Mullõ tull mõtõ, et kuis olõsi, ku mul olõsi olnu ette nätt sündüdä Ramallin? Usku või, et ma olõsi võinu olla tuu tohtri asõmõl.
Hindä elost NSVL-n ma tiidse, et mullõ sukugi nii väega es istu kõgõvõimulinõ kõrd.
Olõs ma palõstiinlanõ olnu, ei olõs ka ma kimmähe saldnu sõaväe administratsiuuni.
Nii mi kai tõõnõtõist, kooni meile teedä anti, et Arafatiga oll saadu jälki kokko leppü, nii et suur jago vangõ saadõtas kodo.
Ma saisi automaadiga peris bussi ussõ man, kon priis lastu laagri elonigu pääle lätsi.
Käe olli näil iks viil ravvon.
Kõik lätsi pääle ilma hellü tegemäldä.
A ku mu "tutva" joudsõ ussõni, kai tä mullõ sügävähe silmä, naaraht ja ütel "Shalom"*.
Ja sõs astõ tä bussi pääle ja timä takan lätsi pääle kõik tõõsõ vangi, vaikusõn.
 
*Shalom tähendäs heebreä keelen ”rahu”, taad sõnna tarvitõdas tervitüses nii tulõgi ku minegi pääl.
