#Uma Pido loengupäiv Põlvan
#28/04/2015 Autor umapido
Täämbä päälelõunal oll’ Põlvan Uma Pido loengupäiv, kohe tull rahvast nii Vana Võromaa Põlva ku Võro maakunna jao päält.
Loengit avit sisse juhata Ilvesse Aapo tulõvadsõlõ Umalõ Pidolõ pühendedü lauluga “Puu kasussõ korgõs”.
Loengupäävält kodotii pääle minti Kalla Urmassõ iist võetu rahvalauluga.

Kõivupuu Marju kõnõl, kuis Uma Pido võrokõisilõ õks ka edespite kõrda läässi.
Tuus om tähtsä meelen pitä, et pidol olõs väkev sõnnom; et pido ei tähendä kontsõrti; et pido piät olõma osaliisi, mitte kõrraldajidõ näko ja et kõgõ tähtsämb om kaia, et latsõ saassi olla pidol osalisõ.
Märgotõdi ka kuun, kuis kihlkundlikku vaimu pidol inämb nätä olõssi ja lõpõtõdi Marju võrdpildiga Vana Võromaa kultuurist ku põlitsõst puust – ku tuu maaha võtta, jääs elo vaesembäs.
Elleri Kalle kõnõl, kuis är tunda põlist mõtsa ja põlist usku ja kuis nuu kokko käävä.
Tull vällä, et põlinõ mõts olõ-i kimmähe tuu, ku mõtsa all omma suurõ puu risti-rästi  maaha sadanu, juurõ pistü.
Põlitsõ mõtsa tunnussõs võiva olla hoobis näütüses mõtsan kasuva korgõ ja sirge lõhmussõ, a ka pallo mõtsaandõ.
Mi rahvas taha-i viil usku õdagumaist tõtõ, et inemisel ütsindä om hing.
Inemise käävä õks ka täämbädsel pääväl puiõlõ kaibama, ku elon midägi halvastõ om.
Taa om mi rahva usk vai miil, maamiilt olõminõ.
Põlist mõtsa mass hoita, selle et ku tuud jääs vähämbäs, sõs jääs ka maamiilt veidembäs.
Neläs Uma Pido tulõ tsipa inämb ku aasta peräst, 28. mail 2016 Põlvan Indsikurmun.
Pido kõnõlõs mõtsast ja väeliisist puiõst.
Pidoteemaliisi loengupäivi om plaanin viil pitä.
Pildi autor om Ülle Harju.
