Võrokeelitside koorilaulõ võigõlusõlõ tull´ 27 tüüd


Seo keväjä välläkuulutõdulõ võrokeelitside koorilaulõ ja -säädide konkursilõ tull´ 27 tüüd.
Hindajidõ kogo tege uma otsussõ novvembri alostusõs ja osavõtjit tennätäs ja parõmba’ saava’ avvuhinna’ 29. novvembril Kanepi seltsimajan Kanepi segäkoori 130 juubõlil.
Konkursitöie hulgast loodõtas löüdä vahtsõt võrokeelist lauluvarra, muuhulgan ka 2016. aastagal peetävä neländä Uma Pido jaos.
Seo aastaga keväjä pääle nakanu võrokeelitside koorilaulõ ja –säädide konkursilõ tull´ tähtaos (23. sept 2013) 27 tüüd.
Kolm 3 hääd võrokeelist teksti omma’ saanu vahtsõ viie ja koorisääde ja 24 joba olõman laulu vai rahvalaulu omma’ saanu vahtsõ sääde.
Kõgõ inämb miildüs tegejile kirota segäkoorilaulõ – noid tull´ konkursilõ 19, a om ka 4 miihikoorilaulu, 1 latsikoorilaul ja 3 naisikoorilaulu.

Säänest konkurssi tetä-i edimäst kõrda – inne tõist võrokeelist laulupito kõrraldõdi niisamatõ konkurss ja töid tull´  tuukõrd 17, minkast katsat ka 2010. aastagal Põlvan olnu II Umal Pidol ka laulõti.
Inne kolmandat võrokeelist laulupito olnu konkursilõ tull´ sarnatsõlt seo konkursiga 27 tüüd.
Noist 5 laulõti 2013. aastagal olnu kolmandal pidol Võrol.
Ka mitmõ’ tõsõ’ laulu’ omma’ löüdnü uma kotussõ kuurõ lauluvaran – katõ varatsõmba konkursi matõrjalõ päält anti 2013. aasta sügüse vällä võrokeeline koorilaulik „Om laul, miä kokko köüt“.
Hindajidõ kogo, kon omma’ viiemeistri Piret Rips Laul, viiemeistri ja dirigent Riivo Jõgi, rahvamuusik Ott Kaasik nink dirigendi’ Silja Otsar ja Saidi Tammeorg tege uma otsussõ novvembrikuu alostusõs.
„Hää om tuu, et kõigi hindamiskogo liikmide juurõ’ vai kodokotus omma’ määnestkipiten vanal Võromaal, nii ei olõ näist kellelegi ka laulõ tõlki vaia“ arvas´  Uma Pido projektijuht Triinu Ojar.
Konkursi avvohinnafond om 3000 eurot ja tuud omma’ tugõnu Eesti Kultuurkapitali rahvakultuuri sihtkapital, Võro ja Põlva ekspertgrupi’, Võro vallavalitsus, kultuuriministeeriumi Vana Võromaa kultuuriprogramm, Põlvamaa umavalitsuisi liit ja Võro Selts VKKF.
Ossavõtjit tennätäs ja parõmbit avvohinnatas märdikuun.
Vahtsõl aastagal imäkeelepäävä (14. märdsi) paiku om kavan koorikontsõrt, kon laulõtas võigõlusõlõ saadõtuid laulõ.
