Ilmar Taska, 63 a.
film, tiatri, TV:

Põhahummogu-Kalifornian, Sierra Nevada mäki jalalt õdagu poolõ, Gold Route’in, vingõrdas käänüliidsi mäki vaihõl oron kitsas tii, miä juusk ütsiotsõ üle vatutavidõ mägijõki, kon veeren olli' ütskõrd vana' leeriplatsi' siltega ”Italian camp”, ”French camp”… Siiä' olli' pesä tennü' kullakaibja', õnnõotsja' kavvõst Euruupast.

Pääväst päivä olli' nä sõgõlnu' kipõ joosuga külmän jõõn muast liiva, luutõn rõbahta' kulla pilgahtuisi.
Vai oll tuu kõgõst vii päält vasta paistuva päävä helge', silmäpetjä? Inämbähe jäi sõgla pääle õnnõ liiv, muld.

Siiä' kavvõlistõ mulda sai pallo näid maetus.
Ummõhtõ mitte kõik.
Kulda jo lövveti.
Tõõnõkõrd lövveti tuud siist liivatsõst mullast.
Tuuga kaubõldi, tuu peräst tapõldi, koolõti.
Tuud vaihtõdi rahas ja rikkusõs.
Kas ka õnnõs?

Kullaorost edesi sõita', korõmbal mäki pääl, oll indiaanlaisi elokotus, kink territooriumi värehti iin tull annis tuvva' mitte kulda, aga tubakut, - pääväle, kuulõ ja tähile.
Ka nuu' taivalisõ' helksi' ku kuld, a näid saa-as rahas vaihta'.
Tipi tseremoonia pääl käve märgpiip käest kätte ja tennäti Luujat iku ni lauluga.
Istuti mullast maa-altri kullatsidõ tulõkiili ümbre ja käüdi läbi iinvanõmbidõ vaimõga, et näide käest api nõvvuta'.
Kuld oll näide käest är' võtnu' mulla, kullaotsja' aanu' nä üles mäki pääle vai viläldä' kõrbõmailõ.

Kas ka Luujalõ lähembähe?
