Võro keele ja kultuuri oppusõ tüülehti konkurss
Vahtsõ opimatõrjaali saamisõs kõrraldas Võro Instituut oppajilõ võro keele ja kultuuri oppusõ tüülehti konkursi.
Tüülehti tsihtrühm om I, II ja III kooliastmõ ni gimnaasiumiopilasõ’.
Kõgõ parõmbit auturit kitetäs häie avvuhinduga.
Konkursilõ omma’ oodõt tüülehe’, miä avitasõ nii võro keele ja kultuuri oppusõ ku ka määndse taht tõsõ opiainõ võro keelen oppamist laapsambas tetä.
Määndse taht muu opiainõ võro keelen oppamisõ lättes om parhilla järest inämb pruugitav opiainide poimitult oppaminõ/opminõ (lõiminguprintsiip).
Konkursitüü nõudmisõ’:
Tüüleht piät olõma võrokeeline.
Auturi’ võiva’ küssü’ keelenõvvo Võro Instituudist.
Konkursitöie teemarühmä’ omma’:
I kodoluulinõ
II etteant võrokeelitsist (latsi)raamatist nakkav
III võro keelen opatavist miä taht muist opiainist nakkav
Konkursile või esitä ku paljo taht tüülehti, vabalt või valli’ ka teemarühmi.
Tüülehel piässi olõma vähämbält kolm esi ülesannõt, miä kõik nakkusõ’ lehe päämidest teemast.
Tüü man hinnatas mõtõt, toda, kuis ülesannõt saa tetä, metoodilist tävvelidsust ja poimitust (lõimingut) tõisi opiainidega.
Töie esitämise tähtpäiv om 31. urbõkuu (märts) 2014.
Töid hindas neli inemist.
Egä vannusõrühmä töid hinnatas eräle.
Konkurss võetas kokko 24. mahlakuu pääväl Sännä mõisan peetäväl 15. Adsoni-nimelidsel luulõlugõmisvõigõlusõl.
Kõgõ parõmba’ auturi’ saava’ väärt avvuhinna’.
Kõrraligu’ ja hää’ tüülehe’ avaldadas Võro Instituudi  kodolehe pääl ja jagatas muudmuudu kõigilõ näide pruukmisõst huvitõt oppajilõ.
Tüü esitämisel tulõ arvõsta’, et autur om nõvvun tüülehti tasulda avaldamisega ja and välläandjalõ tasulda pruukmisõ õigusõ.
Välläandja või teksti kiilt toimõnda’.
Konkursitüü täpsämbä’ vormilidsõ’ ja sisolidsõ’ tigimusõ’ omma’:
Tüü tulõ esitä’ A4-formaadin (harotusõ’ üten vastussiga piät mahtuma üte-katõ lehe pääle).
Välläandja või teksti lühkümbäs tetä’.
Pruuki’ Times New Romani šrifti, tähe suurus 12.
Mitte pruuki’ segiläbi nii suuri ku väikuid tähti, šrifte, kaldkirja ja tinnet trükkü (vai õnnõ sõs, ku taa om siso saisukottalt tarvilinõ).
Teksti vormindamisõga naada pääle lehe kura veere puult.
Ega tüüleht tulõs esitä’ eräle tekstifailina.
Ilosas tegevä (illustriirvä) matõrjaali pruukmisel rehästä’ taast teksti seen, näütes: (kae foto 1).
Rehästü matõrjaal panda mano eräle failina.
Tüülehe esitäjä vastutas illustriirvä matõrjaali auturiõiguisi iist.
Tüü saata’ kas e-postiga eräle tekstifailõna vai paprõ pääl.
Eräle ütenkiräga nimmata’ tüülehe esitäjä nimi, telefon, e-posti aadress.
Egä esitüse manu kirota’, määndsele vannusõrühmäle om tüü mõtõldu ja määndse teema all kandidiir.
Tüü saata meili pääle allas.tiia@gmail.com  vai aadrõssil Võro Instituut, Tarto 48, Võro 65609, märgosõna: tüülehti konkurss.
Lehti kokkopandmisõs etteantu võrokeelitse (latsi)raamatu’ omma:
Triinu Ojar „Suur must koer. Suur must pini“ (2007) 
Tiina Nopola, Mervi Lindman „Siiri ja kolm Ottot“ (2013)
Valtri Ets „Mõtsa pühäpäiv“ (1999)
Erkki K. Kalela „Kuusõsiimnide minek“ (2012)
Juhan Jaik ”Kesväesä” (1998)
Nele Reimann „Võromaa kodolugu“ (2004)
Elina Sildre “Topõltvatuga kukli” (2012)
“Võrokiilne lugõmik” (1995)
“Mino Võromaa” kogomiku’ 1-26
Kodoluulidse tüülehe lättes või olla’ ka määne taht muu kodoluulinõ matõrjaal auturi hindä ärnägemise perrä, nisamatõ opikäük vms.
Alosmatõrjaalõ või pruuki ka mitmit: kodoluulidsi töie rühmän näütes Juhan Jaigi ”Kesväesä” ja ”Võromaa kodolugu” vms variandi’.

Võro Instituut
