III Uma Pido Võro Kubijal

Kurõ’ prõlla’ viil kogonõsõ’, likõ süküs ja pikk talv tulõva’ kah üle ellä’, a usot vai ei’ – üts päiv om asi ummõtõ nii kavvõn, et vahtsõnõ kevväi om peräle jõudnu ja inemise’ Vana-Võromaa kihlkunnõn heränese’ üles ja nakasõ’ uutma.
Nakasõ’ uutma vahtsõ suvõ lämmind ja uutõn nakas süämen helisemä üts tutva helü.
Helises nii kimmähe, et sünnüs tahtminõ hõigada’: “Tulkõ’, tulkõ’, pido nakas pääle!”

III võrokeeline laulo- ja rahvapido Uma Pido peetäs maaha 1. juunil 2013 Võrol Kubijal.

Oodõdu’ omma’ kõik Vana-Võromaa naisi-, miihi- ja segäkoori’, suurõmba’ ja vähämbä’ laululatsõ’.
Ja ku’ võrokõisi kõrvalõ mahus, sõs oodami ka kõiki tõisi laulukuurõ egäst Eestimaa kihlkunnast.
Laulami joba tutvit laulõ, a ka vagivahtsit, õkva seo pido jaos säetüid laulõ.
Kunstilidsõlt säedäs pidolaulõ vaihõlõ Võhandu pühhä jõkõ ja tuuperäst om laulõ hulgan ka palvit ja pallõmiisi.
Vahtsõmba’ uudissõ’ lauluvara ja registriirmise kotsilõ tulõva’ rehekuun.
Kaia’ või ka mi kodolehe pääle: www.umapido.ee

Väiku mõtõlus III Uma Pido püüne pääle säädjält Tagamõtsa Tarmolt: “Uma egäpäävätsen kipõn olõmi ku kuivas jäänü jõgi ilma vahtsõ elolda’.
Kuis olõs, ku jäässimi kõrras saisma, tulõssimi umast moodulidsõst loodsikust vällä ja jäässimi suvõs taaha madalahe vette paigalõ.
Ku lövvässimi hindäle egäüts üte kivi, miä om väke täüs ja istussimi sõs tuu kivi pääle.
Ja mõtlõsimi tuu pääle, kohekotsilõ mul kipõt om?
Sammamuudu mu umatsiil ja mu rahval?
Vai om eski parõmb olla’ kivi, tuusama, mille pääl istut, ja hoita’ kinni’ paigast, kohe tunnõt hinnäst juuriga kuuluvat?
Olkõ’ pääle, et kivi pääl istun saa tagaots sakõstõ likõs ja sõs nakasõ’ tõsõ’ naarma, lõpus esi’ kah.
A niimuudu masski ellä’ ja mõtõlda’, naarda’ ja ellä’ – taan om võro väke!”

Uma Pido kõrraldaja’ suuvva’ kõigilõ lauluinemiisile hüvvä vahtsõt aastakka!

Ursula Zimmermann
III Uma Pido pääkõrraldaja
Tel: 56 98 98 18
E-mail: ursula@wi.ee
