Uma Pido
Pressiteedüs
25.04.2013

Moisekatsi Elohelül saadõtas päiv Uma Pido laulõga mõtsa taadõ

26. aprilli õdagu alostusõga kell 20.00 lauldas  Moisekatsi Elohelül päiv Uma Pido laulõga mõtsa taadõ ni tetäs valla XIV rahvamuusikatüütlüisi festival.

„Om saanu traditsioonis, et noil aastil, ku peetäs võrokiilne laulu- ja rahvapido, tegevä’ Moisekatsi Elohelü ja Uma Pido ütistüüd.
Nii tulõvagi riidi Moostõhõ kokko III Uma Pido kunnakoori’ umbõs 50 lauljaga, et iist võtta ja kutsu rahvast üten laulma kolmõ rahvalaulu seokõrdse Uma Pido repertuaarist,“ kõnõlõs Uma Pido iistvidäjä Ursula Zimmermann.
„Näist kats, Räpinä ja Põlva kihlkundõ rahvalaulu’, lauldas kunnakuurõ iistvõtmisõl Kubija pedäjide all, 1. juunil, tunn aigu inne õdagust pääkontserti,“ ütel´ pido kõrraldaja.

„Kari kodo!“ lauldas Uma Pido pääkontsõrdi laulukavan koorilaulõ vaihõlõ.
Regilaulõ üten haardmisõga programmi luutva’ kõrraldaja härgütä’ kõiki, säälhulgan publikut, tagasi mi uma muistitsõ laulukombõ mano.

Moostõ järve veeren laulõtava viie koorilaulu hulgan omma’ ka „Võromaa laulu’“ ja “Võro kiil,“ mis ka 1. juunil Kubijal helisemä nakkasõ’.
Moostõ järve veeren laulva’ Moostõ segäkuur, Tilsi segäkuur ja Põlva segäkuur „Kevadised Hetked!“.
Kuurõ juhatasõ’ Jaanus Prükk, Saidi Tammeorg ja Kalev Lindal, kiä kõik omma’ ka Uma Pido dirigendi’ ja Andres Määr, kiä om kah mitund muudu Uma Pidoga köüdetü.

Uma Pido om võrokõisi laulu- ja rahvapido, mille päämine mõtõ om jaka’ võrokõsõs olõmisõ ni võro keele ja kultuuri tundmisõ rõõmu.
Edimäne Uma Pido peeti 2008. aastagal Võrol, tõnõ pido 2010 Põlvan, seokõrdne jälleki Kubijal.
Pidokotussõ jagaminõ Võro ja Põlva maakunnakeskuisi vaihõl näütäs Vana Võromaa üttehoitmist.
Aoluulidsõ Vana Võromaa ala käü katõssa Lõuna-Eesti kihlkunda: Harglõ, Rõugõ, Karula, Vahtsõliina, Kanepi, Urvastõ, Põlva ja Räpinä.

Teedüst saa mano küssü’
Mari-Liisa Parder
III Uma Pido kommunikatsioonipäälik
mariliisa.p@gmail.com
tel 50 52 517


Ursula Zimmermann
III Uma Pido vidäjä
ursula@wi.ee
tel 56 98 98 18
www.umapido.ee
umapido.wordpress.com
