III Uma Pido 
1. piimäkuul 2013 Võro Kubijal

Ütteaigu paikkundlik ja üle-eestiline Uma Pido
Pido mõtõ sai alostusõ 2006. aastagal võrokõisi suvõülikoolin. I Uma Pido oll’ 2008. aastagal Võrol ja II Uma Pido 2010. aastagal Põlvan.
III Uma Pido tulõ 1. piimäkuu pääväl 2013 Võro Kubija laulukaarõ all.
Uma Pido om võrokeeline laulu- ja rahvapido. Ütest külest om taa paikkundlinõ, Vana Võromaa pido, miä köüt ütte aoluulist kultuuriruumi katsa Lõuna-Eesti kihlkunnaga.
Samal aol om tä ka üle-eestilidse mõoga kultuurisündmus, üts suurõmbit perändkultuuri tähtsäs pidävide sian.
Sjoolõ pidolõ om hinnäst kirjä pandnu 3600 lauljat - miä om rohkõmb ku kunagi varõmb. Tulijit om ka  kavvõst välästpuult Vanna Võromaad, esiki Lätist ja Soomõst.

Laul ja juurõ’
Uma Pido olõ-i lihtsähe laulupido, taa om sündmüs, miä köüt ütte Eestile tähtsit väärtüisi ­– laulupidotraditsiuuni ja kotussõvaimu.
Suurõn üleilmastumisõn om terve Eesti rahva identiteet kimmämb, ku egän Eesti nukan om uma hindätiidmine ja (kõrg)kultuurisündmüse’, miä tuud vällä näütäse’.
Pido lõugahus kõnõlõs inemisest ku puust – ku juurõ’ omma kimmält maa seen ja tüvi tukõv, sõs või ladõv rõõmsahe tuulõn liiku ja laulda’.

Uma Pido laulu’
Uma Pido koorirepertuaar tetäs egäs pidos vahtsõnõ, sääne, miä köüt egän iän publikut.
Teno pidolõ om võrokeeline lauluvara pall’o rikkambas saanu.
Pido kava sais kuun rahvalaulõst, rahvaligest laulõst, klassikaliisist koorilaulõst ja vahtsõmbist kuurõlõ säet laulõst.
Seol pidol om eräle tähtsä kotussõ pääl vanõmb lõunaeesti rahvalaul.
Kuurõ saat Lõuna-Eestist peri professionaalsist muusikist kokko pant Uma Pido punt, kon mängvä’ Jaan Randvere, Henno Kelp, Meelis Jaanimägi ja Andres Neissar.
Kiilpilliorkestrin mängvä’ Võro ja Põlva muusigakuulõ opilasõ’.
Nigu mineval pidol, kuts ka III Uma Pido jälki kokko kunnakuurõ – neo’ omma’ koori’, miä pantas kokko sõprus-, pere, kogo- vai muiõst kunnõst, kedä köüt kuuntegemise ja –laulmisõ mõno.
Niisamatõ oodõtas jälki naisi nurmõst ja miihi mõtsast, kiä kunagi varramba kooli- vai tudõngi-iän omma’ laulnu, a parla ütengi koorin ei käü’.

Uma Pido püüne pääle säädmise plaani’	
III Uma Pido püüne pääle säädjä Tarmo Tagamets taht lavastusõn näüdätä Võhandu jõkõ ku viitiid, miä juusk läbi kuvvõst Võromaa kihlkunnast.
Päält vii omma’ lavastusõn tähtsä’ ka kivi’.
Kivi’ omma’ õks mi rahva elo mano käünü.
Lavastus taht panda’ päältkaejat märkmä, et vast olõs ka täämbädsel pääväl hää mõtõ mõnõ kivi pääle istu ja perrä kaia’, kohe meil sõs õks niipall’o kipõ om.
Vai kas omgina? Lavastus üten muusikaga and meile sõnomi elo jakkumisõst Lõuna-Eestin.
Uma Pido näütäs, et Eesti om sisest pall’o suurõmb ku väläst.

III Uma Pido kõrraldamisõ man omma’ MTÜ Võro Selts VKKF, Võro ja Põlva Maavalitsusõ’, Võro Liinavalitsus, Võro Instituut ja pall’o Võro ja Põlva maakunna kultuuri- ja muusigainemiisi.
III Uma Pido lavastaja om Tarmo Tagamets, kunstnik Tuuli Tubin, päädirigent Silja Otsar, pääkõrraldaja Ursula Zimmermann.
Mi kodoleht: www.umapido.ee
