Kutsminõ konvõrendsilõ
ÕDAGUMERESOOMÕ KEELEQ KAARTÕ PÄÄL
Läänemeresoome keeled kaartidel
Itämerensuomalaiset kielet kartalla
Finnic languages on the map

Võromaal 24.–26. rehekuu (oktoobri) 2013

Võro Instituut ja Tarto Ülikooli keeletiidüse, filosoofia ni semiootiga doktorikuul kõrraldasõq 24.–26. rehekuul 2013 Võromaal rahvusvaihõlidsõ konvõrendsi „Õdagumeresoomõ keeleq kaartõ pääl“.
Konvõrendsilõ oodõtas ettekandit, miä pututasõq õdagumeresoomõ kiili näütämist kaatõ pääl. Jututeemas võivaq tullaq keeleatlasõq, sõnavara ja samakeelejuuni levimine, keelevahjõ mõõtmisõ tehniga ja mooduq, vahtsõq võimalusõq keelelidse kraami kaardipildi pääl näütämises ja kokkokor´atuidõ keelenäütide kaardiga köütmises.
Tõsõs omma oodõdu ettekandõq õdagumeresoomõ kotussõnimmist aoluulidsi kaartõ pääl, vahtsist lättist, midä om lövvet, ja tunnõtuidõ lättide vahtsõst tõlgõndamisõst.
Kolmandas oodõtas ettekandit keele ja rahva vällänäütämises kokko pantuist kaartõst, kaartõga tõistsugudsõ pildi kujundamisõst, kaardist ku võimu ja rahvustundõ sümbolist.
Konvõrendsi üts tsiht om ette valmistaq õdagumeresoomõ kotussõnimmi atlasõ luumist. Seoga köüdüssen oodõtas ettekandit, miä tutvustasõq eri maiõ ja maanukkõ kaartõga köüdetüid kotussõnimmi andmõbaasõ. 
Konvõrendsi tüükeeleq ommaq õdagumeresoomõ keeleq ja inglüse kiili.
Ettekandidõ ümbrepandmist ei kõrraldõdaq.

Kirjäpandminõ ja muu konvõrendsiteedüs
 
Ku otsustat konvõrendsilõ tullaq, pallõmi õkva är täütäq registriirmisleht aadrõssi http://www.wi.ee/index.php/konverents pääl (kõgõ ildamb 15.08).
Ku tahati ettekannõt pitäq, pallõmi saata uma jutu kokkovõtõq (kooni 200 sõnna) üten konvõrendsi tüükeelen 15. põimukuu (august) pääväs.
Ettekandidõ pikkus om 20 minotit.
Oodami ka sainaettekandit.
Võro Instituut om tenolik, ku tiiti umast ettekandõst artikli ja saadati tuu avaldamisõs Võro Instituudi Toimõtiisi 2014. a numbrõn (kõik artikliq retsenseeritäseq).
Konvõrendsi osavõtumass om 50 eurot.
Teno tävvendäväle toetusõlõ saa konvõrendsi osalinõ tuu iist katõs üüs üümaja konvõrendsipaigan ja süümise neläpäävä õdagusöögist puulpäävä lõunani.
Kinkal vaia, saa konvõrendsi bussiga Tal´na sadamast vai Tartost konvõrendsipaika ja perän tagasi.
Tarto Ülikooli keeletiidüse, filosoofia ni semiootiga doktorikooli liikmõq (doktorandiq ja juhendajaq) saava konvõrendsisst ossa võtta ilma osavõtumassu masmalda.
Kirjäpandnuilt oodami osavõtumassu ildambalt 15. süküskuu pääväs (15.09.2012). Massa tulõ kas konto 10220034796011 (SEB) vai 221023778606 (Swedbank) pääle, massu saajas tulõ märki Rahandusministeerium, viitenumbrõs 2100082120 ja seletüses Võru Instituudi konverents.
Massa saa õnnõ pangaülekandõga.
Arvõq masmisõ kinnitüses saadõtas lakja 25. süküskuu pääväs.
Kiä taht saiaq arvõt ette, et kõrraldaq masmist arvõ alussõl, piät tuud registriirmislehe pääl teedäq andma.
Konvõrendsi järgmäne teedüskiri üten kavaga saadõtas kirjäpandnuilõ lakja süküskuun. Küsümiisile vastasõq: Evar Saar vai Tuuli Abel, Võro Instituut, Tarto huulits 48, 65609 Võro liin, e-post: wi@wi.ee, tel +372 78 21960, tel +372 78 28754.
