Pini ja talv

Suur must Pini ja inemine omma sõbra.
Pini taht kõgõ sääl olla, kon inemine om.
Ja ku pinni olõ-i nätä, nakkas inemine tedä pia otsma.
Talvõaigu taht inemine inämb tarõn olla.
Sääl lämmän om hää lukõ, muusikat kullõlda ja laisk olla.
Pini tükk sõs inemise mano tarrõ – tä taht kah lämmän tarõn laisk olla.
Lukõ pini ei viisi, a muusikat kullõs tä külh.
Muusika kullõminõ tege unitsõs ja sõs tulõ laisk olõminõ parõmbahe vällä.

Pini ja lumõst naanõ

Pini inemiisile tulõva liinast sõbra küllä.
Nä ei saa liinan lumõga mängi, selle et lumi om liinan must ja jälle.
Sõbra tahtva ullimuudu välän olla, hinnäst lumõ sisse käkki, lumõsõta ja tõisi põnõvit asju tetä.
Kõigi ulluisi lõpõtusõs tegevä sõbra lumõst naasõ.
Lumõst naanõ om tõistõ ku lumõmiis vai lumõmemm.
Lumõst naanõ om perisnaasõ muudu.
Täl omma tissi ja suur tagaots.
Inemise pandva lumõst naasõlõ timä nõna ala suuri tisse pääle süvvä.
Ku inemise ei näe, näpsäs pini söögi är.
„Las nä arvasõ, et lumõst naanõ mõist süvvä,“ mõtlõs pini.

Pinilõ tulõ vahtsõnõ aastak

Inemise kõrraldasõ aastagavaihtusõ aigu pido ja kutsva sõbra küllä.
Kõik sõbra toova pinilõ midägi üten.
Üts sõbõr tuu ärkuivatõdu tsiakõrva, tõnõ -hanna ja kolmas jürämiskundi.
Külh pini om rõõmsa! 
Inemise tegevä ummi sõpruga kuun mitund sorti süüke.
Sõs nä söövä, kõnõlõsõ juttu, tandsva, sõs jäl söövä ja nii edesi.
Pini süü kah egä kõrd, ku inemise söövä.
Inemiisi kõtu saava väega täüs.
Pini kõtt niisamatõ, tä ei taha inämb eskina jürämiskunti jürrä.
Sõs läävä inemise vällä rakette kaema.
Tuud pini ei taha, selle et tä pelgäs rakette.
A ütsindä tarrõ jäiä om kah hirmsa.
Pini lätt sõski üten inemiisiga vällä ja hoit häste uma inemise lähkühe.
Ku tä saassi, läässi tä peris üskä nigu sõs, ku tä viil väiku oll.
Inemise suuvva ütstõsõlõ ja pinilõ hääd vahtsõt aastat ja kõik kallistasõ tõnõtõist.
Ku raketi otsa saava ja vahtsõnõ aastak joba veidü aigu käen om olnu, läävä kõik är magalõ.
Pini näge unõn, et tä tahassi jürämiskunti jürrä, a ei saa, selle et kunt juusk täl iist är. .... selle et kunt lindas õhku nigu vahtsõaastaüü rakett.
